एक सुंदर घर आजकाल प्रत्येक व्यक्तीचं स्वप्न असतं. नवीन घर विकत
घेतलं की मात्र त्या नवीन घराची सजावट करणं म्हणजे कौशल्याचं काम असतं आणि
त्यातून जर तुमच्या घरी लहान मुलं असतील तर मात्र कोणती गोष्ट कुठे आणि कधी
सजावट हा पालकांना पडलेला मोठा प्रश्न असतो.
म्हणजे घर सजवताना अधिक काळजी घ्यावी
लागते. कारण लहान मुलं कधीच कोणत्या जागी स्थिर बसत नाही. कुठे एखादी गोष्ट
लपवून ठेवली असेल तर तीच गोष्ट पाहण्याची त्यांना उत्सुकता असते. म्हणूनच
घरात लहान मूल असेल तर घराची सजावट करताना घरातील काचेच्या वस्तूंची जागा,
काही विजेची उपकरणं, औषधं आदी गोष्टींची व्यवस्था चोख ठेवावी लागते.
अशीच एक महत्त्वाची गोष्ट म्हणजे
इलेक्ट्रिक पॉवर आऊटलेट्स. ही जागा लहान मुलांपासून कशी लांब ठेवता येईल
याची काळजी घेणं आवश्यक आहे. गेल्या काही वर्षात याची जागा कुठे असावी यावर
चांगले शोध लावले आणि त्यानुसार काही अशा डिझाईन तयार केल्या, ज्यामुळे
तुमची इलेक्ट्रिक पावर इनव्हिजिबल दिसेल. थोडक्यात हा कन्सिलचा प्रकार असला
तरी त्यात दिसायला आकर्षक असे विविध पर्याय आहेत, ते कोणते आहेत हे जाणून
घेऊया.
सॉकेट आत राहील अशी एक लाकडी, खिडकीप्रमाणे दिसणारी चौकट करावी. आपल्याकडे स्लायडिंग दरवाजे असतात त्याप्रमाणे त्या एक छोटासा दरवाजा असेल. त्या दरवाजावर छोटंसं डिझाईन असतं. त्याच्या आता सॉकेट असेल. हवा तेव्हा या स्लायडिंगचा दरवाजा उघडता येतो. हा दरवाजा बंद केला की जणू काही एखादी लाकडी फ्रेमच लावली आहे, असंच दिसेल.
काही जण इस्त्री किंवा अन्य काही कामासाठी जमिनीजवळ सॉकेट करून घेतात. असं सॉकेट म्हणजे भीतिदायक असतं. वर सांगितल्याप्रामणे लाकडी फ्रेमची डिझाईन नको असेल तर तुम्ही त्याला छोटंसं दार करू शकता. दार केलं की त्याला कुलूपही लावता येतं. म्हणजे ते उघडण्याची भीतीच नाही.
आपला जो मुख्य स्वीच बोर्ड असतो, त्याचा आकार मोठा असतो. त्याची दररोज काही गरज भासत नाही. त्यामुळे तो लपवला गेला तरीही चालतो. त्यामुळे त्यावर एखादं दार करून किंवा त्यावर एखादी फोटोफ्रेम लावली तरीही कोणाला आतमध्ये स्वीच बोर्ड आहे याची पुसटशीदेखील कल्पना येणार नाही.
डायनिंग टेबलावर किंवा अभ्यासाच्या वाचायच्या टेबलाला पायावर खाच तयार करून आतमध्ये हे सॉकेट करावं. त्यावर तुम्हाला दारही करता येतं. हवं त्या वेळी तुम्ही ते उघड-बंद करून त्याचा वापर करू शकता. आणि कोणाला कळणारही नाही.
काही काही ठिकाणी क्लॅप म्हणजे टाळीवरदेखील तुम्ही दिव्यांच्या खेळ खेळू शकता. म्हणजे टाळी वाजवली की दिवे डीम होऊ शकतात.
इतकंच नाही तर एसीच्या रिमोटप्रमाणे एकाच रिमोटवर तुम्ही सगळी बटणं लावून एकाच रिमोटवरूनही दिवे बंद किंवा लावू शकतात.
काही जणांना वाचनासाठी बेडजवळ सॉकेट करायची सवय असते. अशा सॉकेटमध्ये बेडवर पडल्या पडल्या अगदी आरामात लहान मुलं बोटं घालू शकतात. किंवा त्याच्याशी खेळू शकतात. मात्र तुमचं बजेट जास्त नसेल तर हल्ली बाजारात कित्येक प्लास्टिकच्या वस्तू मिळतात, ज्या तुम्ही त्या सॉकेटमध्ये घालून ठेवू शकतात.
प्रिता झगडे
No comments:
Post a Comment